راولپنڈی ( مریم صدیقہ دیس نیوز)
علامہ اقبال اوپن یونیورسٹی ریجنل کیمپس راولپنڈی کے زیر اہتمام گورنمنٹ گریجویٹ کالج برائے طلباء سیٹلائیٹ ٹاؤن راولپنڈی میں ربیع الاول کی مناسبت سے”عید میلادالنبی صلی اللہ علیہ وسلم”کی خصوصی تقریب منعقد کی گئی۔تقریب کی میزبان ریجنل ڈائریکٹر راولپنڈی علامہ اقبال اوپن یونیورسٹی مسز نسرین اختر مرزا تھیں۔تقریب میں کالج و یونیورسٹیز سے وابستہ اساتذہ ،طلبا و طالبات، ادبی و مذہبی شخصیات کی کثیر تعداد نے شرکت کی۔تقریب کا آغاز تلاوت قرآن پاک و نعت رسول مقبول سے ہوا۔ڈائریکٹر جنرل ریجنل سروسز ڈاکٹر ملک توقیر احمد خان نے بطور مہمان خصوصی شرکت کی،جب کہ صدر مجلس پرنسپل پروفیسر ڈاکٹر اطہر قسیم گریجویٹ کالج سیٹلائیٹ ٹاؤن اور ڈاکٹر امتیاز احمد مدنی بھی ان کے ہمراہ موجود تھے۔طلبا و طالبات کے مابین نعتیہ کلام پر مشتمل مقابلہ ہوا۔جن میں نمایاں کامیابی حاصل کرنے والے طلبا وطالبات کو سرٹیفکیٹس و شیلڈز پیش کی گئیں،جب کہ ڈاکٹر امتیاز احمد مدنی کی طرف سے تمام طلباء اور طالبات کو قرآن پاک کا ہدیہ پیش کیا گیا۔اس موقع پر ڈائریکٹر جنرل ریجنل سروسز ڈاکٹر ملک توقیر احمد خان ،ریجنل ڈائریکٹر راولپنڈی علامہ اقبال اوپن یونیورسٹی مسز نسرین اختر مرزا،پرنسپل ڈاکٹر اطہر قسیم اور ڈاکٹر امتیاز احمد مدنی نے حضور پاک کی حیات طیبہ پر روشنی ڈالی۔تقریب کا اختتام دعائیہ کلمات سے کیاگیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔